﷽

ھایدگر ئەڵێ قسە و باسی بێ سوود کە لە نێوان خەڵکی دنیا بەردەوام روو ئەدا بۆ ئەوەیە کە بیر ئەکەن ژیان جاودانەیە و قەت مردنێک نییە ، بەڵام دەمێ مردن ھەیە وا باشە بگەڕینە شوێنی پرسیارە جددییەکانی ژیان و واز لە گاڵتەجاڕی و گاڵتە دیتنی دنیا بێنین .

نە من ئەوەندە شەریفم کە لایقی خۆبەخت کردنی کەسێتر بم ، نە کەسیش ئەوەندە شایستەیە کە خۆمی‌بۆ خۆبەخت کەم ، ھەر بۆیە ئێمە ئەشێ فێر بین تەنیایی بە خاڵێکی گرنگ سەیر کەین لە ناو دۆخی ژینمان ، بەم مانا کە کۆمەڵگایی بین بەڵام دەروونمان بۆ سازینی خۆمان بە پارێزراوی ھەڵگرین و لە تەنیایی زیز نەبین .

کوێری زۆرتر لە ھەر پەتایێ تەشەنەی سەندووە . دەمێ ھەنگاوی ناڕێکی دەور و بەرت بیانوویێ بێ کە تۆش ناڕێک ھەنگاو بنێیت ، کردەوەی تۆ رەنگە بشارێتەوە بەڵام تۆش لەگەڵ کۆمەڵ ئەڕووخێی .

دەمێ بیر لە ژیانی خۆم ئەکەم وەکوو مرۆڤێکی بڕوامەند ، بۆم ئەسەلمێت کە پەروردگار چەنێ حضووری بووە لە ژینم . گەرچی خودا ھەردەم لە ژیانی ئێمەی مرۆڤ کاریگەرە و بوونی ھەیە بەڵام لەو ماوانە کە خودای خۆمم بە باشی ھەست نەکردوە زانیومە کێشە و لەنگی و تاوانەکە ھەر لە کار و بەرنامەی خۆم بووە .